Ambasadori i Bashkimit Evropian në Kosovë, Aivo Orav, ka përshëndetur marrjen e detyrës nga kuvendet komunale dhe kryetarët e rinj të komunave në 20 njësi të pushtetit lokal, pas zhvillimit të zgjedhjeve lokale gjithëpërfshirëse.

Në një reagim publik, Orav vlerësoi procesin e dorëzimit të qeverisjes si të qetë dhe pa probleme, duke theksuar veçanërisht edhe katër komunat veriore, të cilat shpesh kanë qenë në fokus të dinamikave politike.

“Sot kuvendet komunale dhe kryetarët e bashkive morën detyrën në 20 komuna të Kosovës pas zgjedhjeve lokale gjithëpërfshirëse. Unë përshëndes dorëzimin pa probleme të qeverisjes komunale, duke përfshirë edhe katër komunat veriore, dhe pres që kryetarët e rinj të përfaqësojnë interesat e të gjithë qytetarëve,” ka deklaruar ambasadori Orav.

Ai shtoi se pret që institucionet lokale të fokusohen në përfaqësimin e barabartë dhe në adresimin e nevojave të qytetarëve pa dallim. Reagimi i Orav vjen në një kohë kur bashkësia ndërkombëtare po vlerëson rëndësinë e stabilitetit lokal dhe funksionalitetit institucional në të gjithë territorin e Kosovës.